75 વર્ષ પૂર્ણ થતા સોમનાથ મંદિર ખાતે અમૃત પર્વની ભવ્ય ઉજવણી, શિખર પર 11 તીર્થોના જળથી કુંભાભિષેક

ભારતના આદ્ય અને પ્રથમ જ્યોતિર્લિંગ તરીકે વિશ્વવિખ્યાત Somnath Temple આજે પણ સનાતન ધર્મની અડગ આસ્થા, અખંડ શ્રદ્ધા અને અવિચળ સંસ્કૃતિનું જીવંત પ્રતિક બનીને અડીખમ ઉભું છે. ઇતિહાસ સાક્ષી છે કે અનેક વિદેશી આક્રાંતાઓએ સોમનાથ મંદિરને તોડવાનો પ્રયાસ કર્યો, હુમલા કર્યા અને તેની સમૃદ્ધિને નષ્ટ કરવાની કોશિશ કરી, છતાં સોમનાથનું તેજ અને તેની ભક્તિની પરંપરા ક્યારેય ખંડિત થઈ નથી. સમયાંતરે મંદિર ફરી ઉભું થયું અને આજે તે પહેલા કરતાં પણ વધુ ભવ્ય સ્વરૂપે વિશ્વભરના ભક્તોને આકર્ષી રહ્યું છે.

સોમનાથ મંદિરના પુનઃનિર્માણને તા. 11મી મેના રોજ 75 વર્ષ પૂર્ણ થતા મંદિર ટ્રસ્ટ દ્વારા “અમૃત પર્વ”ની ભવ્ય ઉજવણીનું આયોજન કરવામાં આવ્યું છે. આ ઐતિહાસિક અવસરને યાદગાર બનાવવા મંદિરના શિખર પર દેશના 11 પવિત્ર તીર્થોના જળથી વિશેષ કુંભાભિષેક કરવામાં આવશે. વૈદિક મંત્રોચ્ચાર અને મહામૃત્યુંજય મંત્રના જાપ સાથે વિશેષ મહાપૂજાનું આયોજન પણ કરવામાં આવ્યું છે, જેમાં મોટી સંખ્યામાં સંતો-મહંતો અને શ્રદ્ધાળુઓ હાજરી આપશે.

આ પ્રસંગે ભારતીય વાયુસેનાના ચેતક હેલિકોપ્ટર દ્વારા મંદિર પર ભવ્ય પુષ્પવર્ષા કરવામાં આવશે. આકાશમાંથી વરસતા પુષ્પો અને હર હર મહાદેવના ગુંજતા નાદ વચ્ચે સમગ્ર સોમનાથ ધામ ભક્તિમય બની જશે. ભક્તોમાં પણ આ ઐતિહાસિક ઉજવણીને લઈને વિશેષ ઉત્સાહ જોવા મળી રહ્યો છે.

આઝાદી બાદ ભારતના લોખંડી પુરુષ Sardar Vallabhbhai Patelએ સોમનાથ મંદિરના પુનઃનિર્માણનો ઐતિહાસિક સંકલ્પ લીધો હતો. દેશના સાંસ્કૃતિક ગૌરવને ફરી જીવંત બનાવવા માટે તેમણે મંદિરના નવનિર્માણને રાષ્ટ્રીય ગૌરવ સાથે જોડ્યું હતું. ત્યારબાદ મંદિરના નિર્માણનું કાર્ય શરૂ થયું અને વર્ષ 1951માં ભવ્ય સોમનાથ મંદિરનું નિર્માણ પૂર્ણ થયું.

11મી મે, 1951ના રોજ ભારતના પ્રથમ રાષ્ટ્રપતિ Rajendra Prasadના હસ્તે નવનિર્મિત મંદિર ખાતે પ્રાણ પ્રતિષ્ઠા વિધિ યોજાઈ હતી. આ ઐતિહાસિક ક્ષણ માત્ર સોમનાથ માટે નહીં પરંતુ સમગ્ર દેશ માટે ગૌરવનો વિષય બની હતી. આજે તે ગૌરવશાળી પ્રસંગને 75 વર્ષ પૂર્ણ થતા સમગ્ર સોમનાથ ધામમાં વિશેષ ઉજવણીનો માહોલ જોવા મળી રહ્યો છે.

અમૃત પર્વ અંતર્ગત આગામી દિવસોમાં ધાર્મિક કાર્યક્રમો, વૈદિક યજ્ઞ, સાંસ્કૃતિક કાર્યક્રમો અને ભક્તિ સંગીતના આયોજન પણ કરવામાં આવશે. દેશભરમાંથી લાખો શ્રદ્ધાળુઓ સોમનાથ મહાદેવના દર્શન કરવા પહોંચશે તેવી શક્યતા છે. મંદિર ટ્રસ્ટ દ્વારા ભક્તોને સુવિધા મળે તે માટે વિશેષ વ્યવસ્થાઓ પણ કરવામાં આવી છે.

સોમનાથ માત્ર એક મંદિર નથી, પરંતુ ભારતની અખંડ સંસ્કૃતિ, આધ્યાત્મિક શક્તિ અને સનાતન ધર્મની અવિનાશી પરંપરાનું પ્રતિક છે. અનેક આક્રમણો છતાં ફરી ફરી ઊભું થયેલું સોમનાથ મંદિર આજે પણ સમગ્ર વિશ્વને એ સંદેશ આપે છે કે શ્રદ્ધા અને સંસ્કૃતિને ક્યારેય નષ્ટ કરી શકાતી નથી.